Мустақиллик шарофати ва Ўзбекистоннинг Биринчи Президенти Ислом Каримовнинг жонкуярлиги туфайли Ўзбек Кураши оламшумул мавқега эга бўлди. Айниқса, 1992 йил 14 апрелда И.Каримов ўзбек курашининг жонкуярларидан бири Комил Юсуповни суҳбатга чорлагани миллий курашимиз истиқболини белгилаб берди. Курашни спорт тури сифатида ривожлантириш, дунё миқёсида тарғибот-ташвиқот ишларини олиб бориш ҳамда жаҳонга олиб чиқиш тўғрисида фикр-мулоҳазалар Комил Юсуповда 1980 йилларда туғилганди ва бу ғоя изчиллик билан илгари сурилди. Шу йиллар давомида у номдор полвон сифатида республикамизда ўтадиган тўйлар - «давра кураши» да фаол иштирокчи бўлиш билан бир вақтда, миллий спортимиз анъанаси ва урф-одатларини ўрганишга ҳам қизиқарди. Шунинг учун ҳам К. Юсупов томонидан миллий курашни жаҳон аренасига олиб чиқиш мумкинлиги туғрисидаги таклиф қизғин қўллаб-қувватланди. Бир неча йиллик изланишлар натижасида улар томонидан яратилган курашнинг янги қонун-қоидалари 1991 йил 14-15 июнда чақирилган Ўрта Осиё ва Қозоғистон илмий конференциясида муҳокама қилинди. 2 кунлик қизғин мунозарадан кейин қоидалар ҳакам ва курашчиларнинг кийимлари тасдиқланди. И.Каримов томонидан Ўзбекистон мустақиллиги эълон қилингандан 17 кун ўтгач, кураш қоидасининг асосий қисми «Спорт» газетасининг 1991 йил 17 сентябрь сонида эълон қилинди. Ўзбекистон Республикаси вилоятларида «Халқ ҳаракатлари ва спорт ўйинлари байрамини ташкил этиш ва ўтказиш» (тавсиянома, Тошкент, 1992 йил) мақолалар тўпламида курашнинг янги қоидалари тўлалигича таърифлаб берилди. 

1992 йилнинг май ойида у «Миллий кураш қоидалари» (Тошкент, 1992 й) номли махсус қўлланма сифатида чоп этилади. Кураш қоидалари полвонларнинг ижобий ҳаракати асосан «Халол», «Ёнбош», «Чала» атамаларини ишлатиш билан баҳоланади. Бир маротаба кўрган томошабин-у полвонлар бу кураш қоидасини осонгина ва тез ўзлаштириб олади. Шу туфайли К.Юсупов томонидан ишлаб чиқилган халкаро кураш қоидаси қиска вақт ичида кураш мутахассислари, мураббийлари, ҳакамлари, энг асосий кураш мухлислари ва халқ оммасига манзур бўлди. Бундан ташқари, унда давра кураши анъаналарини эътиборга олиш натижасида спорт тарихида биринчи маротаба кураш коидасида 36 ёшдан 80 ёшгача ва ундан катта ёшдаги полвонларнинг вазн тоифалари ҳам киритилди. Бу эса курашнинг обрў- эътиборини жуда ҳам кўтариб юборди. Чунки 35-40 дан катта ёшдаги полвонлар курашдан мутлоқ умидини узиб, узоқлашиб кетгандилар. 

1991йил 7-10 август кунлари Шаҳрисабз тумани, Мироки оромгоҳида Ўрта Осиё ва Қозоғистон Республикаларининг полвонлари иштирокида катта кураш сайли ўтказилади. Бу кураш сайли олдинги мусобақалардан тубдан фарқ қилди. Чунки, унда полвонлар мутлоқ янги бўлган қонун-қоидалар асосида курашдилар. Ана шу янги бўлган қонун- қоидалар асосида 1992 йилдан бошлаб нуфузли беллашувлар бошланди. Муҳтарам биринчи Президентимиз Ислом Каримов ўтмишда яшаб ўтган барча паҳлавонлар ва улуғ алломаларнинг руҳларини шод этишни Кураш бўйича халкаро турнирлар ўтказиш билан бошланган эдилар. Қоракўлда Турсун ота, Шаҳрисабзда Амир Темур, Сурхондарёда Ат- Термизий, Бухорода Баҳоуддин Нақшбанд, Андижонда Бобур Мирзо, Хоразмда Паҳлавон Маҳмуд ҳотирасига бағишлаб Президент соврини учун ўтказилган халқаро турнирлар ўзбек курашининг юксак даражага кўтарилишида, спорт оламига янги тур бўлиб киришига катта ҳисса қўшди. Чунки кураш илк мусабақалардаёқ жозибадорлиги ва жанговорлиги, гўзаллиги ва халоллиги билан барча иштирокчиларнинг, хорижий мутахассисларнинг меҳрини қозонди. Миллий спорт турини дунё спортига айлантириш учун мамлакатимизда ташкил этилган бу беллашувлар камлик қиларди. Албатта, шунинг учун ҳам Жанубий Кореа (1992 йил), Канада (1993), Литва (1993), Япония (1994 ), Ирландия (1997 ), Ҳиндистон (1995), Атланта (1996), Москва (1998), Франция ва Ирландияда ўтказилган йирик спорт анжуманларида тўпланган мутахассис ва муҳлисларга ташаббускорлар томонидан ўзбек кураши ҳақида атрофлича маълумотлар берилди, кўргазмали чиқишлар намойиш этилди. 

Тинимсиз меҳнат, кўплаб изланиш ва саъй-ҳаракатлар зое кетмади. 1998 йилнинг 6 сентябрь санаси Ўзбек курашининг бир неча минг йиллик тарихи саҳифаларига оламшумул воқеа юз берган кун сифатида зарҳал ҳарфлар ила битилди. Лотин Америкаси, Европа ва Осиё қитъасининг 28 та давлатидан келган вакиллар иштирокида Тошкентда бўлиб ўтган таъсис конгрессида Кураш Халкаро Ассоциацияси (КХА) тузилганлиги, халқимизнинг миллий қадрияти «Кураш» номи билан Жаҳон майдонига чиққанлиги эътироф этилди. Халқнинг қадим қадрияти, ори ва ғурури бўлган курашнинг жаҳонга юз тутишини ҳар томонлама қўллаб-қувватлаган Ўзбекистоннинг биринчи Президенти Ислом Каримов Кураш Халкаро Ассоциациясининг доимий Фаҳрий Президенти этиб сайланди. Шу конгресснинг ўзида ХКАнинг Ижроия кўмитаси ташкил килинди. Ўзбек курашининг К.Юсупов томонидан ишлаб чикқарилган қонун-қоидалари халқаро қоидалар сифатида бир овоздан маъқулланди ва К.Юсупов Ассоциация Президенти этиб сайланди. 1999 йил Ўзбекистон Республикасининг биринчи Президенти томонидан Комил Юсупов давлат мукофоти - "Эл-юрт ҳурмати" ордени билан тақдирланди.